ham na.e hain na hai ye kahani na.i
saath sharton ke hai zindagani na.i
kya ganva kar mili bahs ye hai fuzul
aḳhirash mil ga.i kamrani na.i
bad-mizaji pe mausam ki hairan huun
kyuun hai dariyaon men ye ravani na.i
chashm-poshi masa.il ki hai is tarah
us ne baton se ki gul-fishani na.i
gamzan dil safar par to sakit qadam
chheḌ di phir unhon ne kahani na.i
us ki ḳhushbu men shamil hai teri mahak
aaj laa.i ḳhabar rat-rani na.i
kis ki chahat ki tasir hai, vaqt ne
us ke paikar men rakh di javani na.i
thi lachak jab talak ziist apni rahi
raas aa.i na ye saḳht-jani na.i
ḳhamushi se hi un ki chaman jal gaya
hukmaranon ki hai pasbani na.i
phuTne ko thi ummid ki ik kiran
ho ga.i phir un ki mehrbani na.i
baḌhte qadmon ko phir se ThiThakna paḌa
aa.i phir darmiyan bad-gumani na.i
vadi-e-gul se mausam ka sautela-pan
us ke dariya men kyuun hai ravani na.i
quvvaten saari goya.i par hain muhit
hain zabanen vahi lan-tarani na.i
saath laa.i na.e gham na.i uljhanen
ab nahin chahiye shadmani na.i
taliyan har taraf thiin ki jab us ne ki
be-zabani se hi lan-tarani na.i
jis ko agle bhi pal ka bharosa nahin
us ko bhi chahiye shadmani na.i
aisa lagta hai ‘ḳhalid’-miyan chahiye
is zamin ke liye jan-fishani na.i
Leave a Reply