Iqbal Tariq
ḳhvab ho ḳhvab men aate ho chale jaate ho
diid ka jaam lunDhate ho chale jaate ho
kisi ummid pe duniya men mujhe zinda rakho
aate ho aas bandhate ho chale jaate ho
meri ankhon men jo lasha hai mire ḳhvabon ka
is pe rote ho rulate ho chale jaate ho
qissa-e-dard kisi taur na bhule mujh ko
roz aate ho sunate ho chale jaate ho
kyuun miri ankhon men har roz na.e aas ke phuul
dosto aa ke khilate ho chale jaate ho
mere zaḳhmon ke liye laao naan marham bhi kabhi
in pe bas jashn manate ho chale jaate ho
raah bhule na koi dasht ka raahi ‘tariq’
is liye diip jalate ho chale jaate ho
Leave a Reply