qirtas o qalam haath men hai aur shab-e-mah hai
ai rabb-e-azal khol de jo dil men girah hai
atraf se har shab simaT aati hai safedi
har sub.h jabin par magar ik roz-e-siyah hai
main shaam se pahle hi pahunch ja.un to behtar
jangal men huun aur sar pe mire bar-e-gunah hai
mahngi hai jahan dhaat mire surḳh lahu se
zardi ke us ashob men to meri panah hai
munh-zor zamanon ki zara khinch le bagen
mere kisi bichhḌe hue ki sal-girah hai
Leave a Reply