Saeed Shahidi
sham-e-gham jab dar-ba-dar ho ja.egi
vaqt se pahle sahar ho ja.egi
dil ki dhaḌkan ka sahara chahiye
aah paband-e-asar ho ja.egi
aap chalne ka irada to karen
saari duniya ham-safar ho ja.egi
Daal to diije nasheman ki bina
barq ko ḳhud hi ḳhabar ho ja.egi
apni aahon par bharosa hai mujhe
jab main chahunga sahar ho ja.egi
muskurane se na hoga aur kuchh
fitrat-e-gham mo’atabar ho ja.egi
dastan ka muḳhtasar hona hi kya
muskura do muḳhtasar ho ja.egi
rahm aa hi ja.ega un ko ‘sa.id’
sham-e-gham ki bhi sahar ho ja.egi
Leave a Reply