Poet
main ḳhvab-gah-e-zat ke andar nahin rahta
insan huun mahaul se kaT kar nahin rahta
mil jaati hai malbe se kisi naam ki taḳhti
dastar to rahti hai magar sar nahin rahta
vo phuul hai gulchin ki rasa.i nahin us tak
aahu hai magar tiir ki zad par nahin rahta
us vaqt satati hai hamen niind ki devi
jab ek sitara bhi falak par nahin rahta
asbab-e-safar le ke nikalte nahin ghar se
is vaste luTne ka hamen Dar nahin rahta
har shaḳhs ki baton se ye andaza hua hai
is shahar men koi bhi qad-avar nahin rahta
kashti ka safar achchha laga hai mujhe ‘nasir’
ab pesh-e-nazar ek hi manzar nahin rahta
Leave a Reply