Ishq To Mushkil Hai Ai Dil Kaun Kahta Sahl Hai

ishq to mushkil hai ai dil kaun kahta sahl hai

lek nadani se apni tu ne samjha sahl hai

gar khule dil ki girah tujh se to ham janen tujhe

ai saba ghunche ka uqda khol dena sahl hai

hamdamo dil ke lagane men kaho lagta hai kya

par chhudana is ka mushkil hai lagana sahl hai

garche mushkil hai bahut mera ilaj-e-dard-e-dil

par jo tu chahe to ai rashk-e-masiha sahl hai

hai bahut dushvar marna ye suna karte the ham

par judai men tiri ham ne jo dekha sahl hai

shama ne jal kar jalaya bazm men parvane ko

bin jale apne jalana kya kisi ka sahl hai

ishq ka rasta sarasar hai dam-e-shamshir par

bul-havas is raah men rakhna qadam kya sahl hai

ai ‘zafar’ kuchh ho sake to fikr kar uqba ka tu

kar na duniya ka taraddud kar-e-duniya sahl hai

Leave a Comment