koi ma.al-e-mohabbat mujhe batao nahin
main ḳhvab dekh raha huun mujhe jagao nahin
kisi ki yaad hai un ki mahak se vabasta
mujhe ye phuul ḳhuda ke liye sunghao nahin
mohabbat aur javani ke tazkire na karo
kisi satae hue ko bahut satao nahin
ye kah raha hai mohabbat ki kavishon se dil
ye mere hansne ke din hain mujhe rulao nahin
ujaḌ ke phir nahin basta jahan-e-dil ‘aḳhtar’
bahar-e-bagh ko is par dalil laao nahin
Leave a Reply