Shafaq Sopori
tu ne nazar se pyaas ki dekha bhi hai kahin
gard-e-jabin-e-dasht men dariya bhi hai kahin
phirta raha huun jis ke ta.aqub men umr-bhar
kya naqsh us ḳhayal ne chhoḌa bhi hai kahin
ya sab hi meri tarah ke avara-gard the
dil men koi qarar se baiTha bhi hai kahin
ham bhi ajab the gharon men utre ye dekhne
bach kar nikalne ka koi rasta bhi hai kahin
kuchh dekhte ki ḳhaak men hain dafn ḳhvab kya
ye gard-bad lamhe ko Thahra bhi hai kahin
phulon ki samt haath baḌhao ye soch kar
af.i siyah shaḳh se lipTa bhi hai kahin
saari sada.en ghaib se aati nahin ‘shafaq’
koi zarur dasht men baiTha bhi hai kahin