Ishrat Afreen
dil hai ya mele men khoya hua bachcha koi
jis ko bahla nahin sakta hai khilauna koi
main to jalte hue zakhmon ke tale rahti huun
tu ne dekha hai kabhi dhuup ka sahra koi
main lahu huun to koi aur bhi zakhmi hoga
apni dahliz pe phenko to na shisha koi
khvahishen dil men machal kar yunhi so jaati hain
jaise angnai men rota hua bachcha koi
zaiche tu ne umidon ke banae the magar
mit gae harf gira ankhon se qatra koi
chandni jab bhi utarti hai mire angan men
kholta hai tiri yadon ka daricha koi
mera ghar jis ke dar-o-bam bhi mehman se the
kaash is ujde hue ghar men na aata koi
dil koi phuul nahin hai ki agar tod diya
shakh par is se bhi khil jaega achchha koi
tum bhare shahr men afkar liye phirte ho
sab to muflis hain kharidega yahan kya koi
raat tanhai ke mele men mire saath tha vo
varna yuun ghar se nikalta hai akela koi
‘afrin’ dard ka ehsas mita hai aise
jaise bachpan men banaya tha gharaunda koi
Leave a Reply