jo chand sikkon ki chaah men kiin vo hijraten kya shumar karna
safar men apnon se duriyon ki aziyyaten kya shumar karna
jo mere dil ki ujaaḌ basti men ek mausam Thahar gaya hai
bala se aa.e bahar ya phir ḳhizan ruten kya shumar karna
jo raushni ka nagar kabhi tha vo aaj andheron men gum hua hai
ujaaḌ andheri udaas viran imaraten kya shumar karna
sameT lenge ham apne daman men apne hisse ki nafraton ko
na thiin hamare nasib men jo vo chahaten kya shumar karna
munafiqat ke gharaz ke rishton men kyuun vafa ko talashti ho
ḳhulus-e-dil gar na ho to aisi qarabaten kya shumar karna
mohabbaton men vo bhige lamhe vo guzre pal vo ruten jo bitin
kahin fazaon men kho ga.iin jo vo sa.aten kya shumar karna
bhula diin ham ne jafa.en saari sitam vo saare bhula diye hain
jo tum ho apne to ab tumhari adavaten kya shumar karna
likhe the naam apne jin pe ham ne daraḳht saare vo kaT chuke hain
miTa diya vaqt ne jinhen vo ibaraten kya shumar karna
rahin dilon men na vus.aten ab na fursaten ab na chahaten ab
na ab mayassar kabhi jo hongi vo sohbaten kya shumar karna
ye sim-o-zar ye harir-o-atlas ye jah-o-hashmat ye auj-o-sarvat
sukun-e-dil hi na de saken jo vo rahaten kya shumar karna
vo chahaten hain jo ḳhuun ban kar ragon men dauran kar rahi hain
mohabbaton se bhara ho daman to nafraten kya shumar karna
tiri raza pe jhuka ke sar ko jo zer-e-tegh-e-sitam kiya tha
vo ek sajda hai sab pe bhari ibadaten kya shumar karna
jo sham-e-bazm-e-suḳhan kabhi the na koi ab un ko janta hai
davam jin ko hua na hasil vo shohraten kya shumar karna
na jaane mahrumiyon ke kitne hi daagh dilbar saje hue hain
kabhi jo puuri na ho sakengi vo hasraten kya shumar karna
ho ra.egan har safar to ‘anjum’ tamam raste hain ek jaise
na manzilen jab nasib men hon masafaten kya shumar karna
Leave a Reply