mire chara-gar tujhe kya khabar, jo azab-e-hijr-o-visal hai
ye darida tan ye darida man tiri chahaton ka kamal hai
mujhe saans saans giran lage, ye vajud vahm-o-guman lage
main talash khud ko karun kahan miri zaat khvab-o-khayal hai
vo jo chashm-e-tar men thahar gaya vo sitara jaane kidhar gaya
na nashat-e-gham ka hujum ab na hi sabz yaad ki daal hai
use fasl fasl bhi sinch kar mila saaya aur na mila samar
ye ajiib ishq ka ped hai ye ajiib shakh-e-nihal hai
mira harf harf usi ka hai mire khvab khvab men vo basa
jo qarib rah ke bhi duur hai use paana kitna muhal hai
Leave a Reply