barq-e-rukhsar-e-yar phir chamki
is chaman ki bahar phir chamki
tu ne phir is ko saan par rakkha
tere khanjar ki dhaar phir chamki
mere girye se ab-o-tab aaya
surat-e-rozgar phir chamki
khun-e-ashiq se vo zah-e-daman
dam-e-shamshir vaar phir chamki
dekhiyo paanv rakh diya kis ne
aaj kyuun nok-e-khar phir chamki
vo jo ik tiis si hai dil men mire
rah ke be-ikhtiyar phir chamki
‘mushafi’ ki jo tu ne dar-rezi
shaeri teri yaar phir chamki
Leave a Reply