Poet
ruh-e-zaman makan mile raz-e-ayan nihan mile
kab se huun garm-e-justuju manzil-e-kun-fakan mile
nadira-e-zaman mile nabigha-e-jahan mile
jis ko main DhunDhta huun vo nazish-e-mah-vashan mile
nala-e-arghavan mile sho.ala-e-arghavan mile
sa.iqa-e-tapan mile jalva-e-be-aman mile
kakul-e-kahkashan khule ariz-e-la-makan mile
dil-bar-e-hast-o-bud ka kaash kahin nishan mile
yuun to hamen hazar-ha jalve jahan-tahan mile
jis ki magar talash hai dekhiye kab kahan mile
DhunD rahe hain aaj tak jin ko vahi kahan mile
varna rah-e-hayat men sainkaḌon karvan mile
shoa.la-fishan zamin par sainkaḌon asman mile
dil ko jahan sakun mile kaash vo astan mile
meri nazar men kam nahin vo bhi kisi se ḳhush-nasib
jis ko gham-e-firaq ki daulat-e-be-karan mile
vaj.h-e-nashat-e-shauq hai kitna hasin vo ek gham
yuun to yahan hazar-ha roz-e-gham nihan mile
soch rahe hain aaj ham apni bhi qadr kya hai kam
vo hamen gar na mil sake ham bhi unhen kahan mile
un ke liye gul-o-bahar aur hamen ḳhizan-o-ḳhar
un ko bhi gulsitan mile ham ko bhi gulsitan mile
soz-o-gudaz-o-dard-o-gham hasrat-o-dil-shikastagi
ziist men kitne qimti ham ko ye armughan mile
qarya-ba-qarya shahr shahr TuuT raha hai aaj qahr
chiḳh uThi hai ruh-e-dahr kaash kahin amaan mile
sham-e-junun liye hue DhunD raha hai shahr shahr
ahd-e-ḳhirad men ‘raz’ ko koi to razdan mile
Leave a Reply