Azm Shakri
ḳhuun aansu ban gaya a.ankhon men bhar jaane ke ba.ad
aap aa.e to magar tufan guzar jaane ke ba.ad
chand ka dukh banTne nikle hain ab ahl-e-vafa
raushni ka saara shiraza bikhar jaane ke ba.ad
hosh kya aaya musalsal jal raha huun hijr men
ik sunahri raat ka nashsha utar jaane ke ba.ad
zaḳhm jo tum ne diya vo is liye rakkha hara
zindagi men kya bachega zaḳhm bhar jaane ke ba.ad
shaam hote hi charaghon se tumhari guftugu
ham bahut masruf ho jaate hain ghar jaane ke ba.ad
zindagi ke naam par ham umar bhar jiite rahe
zindagi ko ham ne paaya bhi to mar jaane ke ba.ad
Leave a Reply