kisi ke naqsh-e-qadam ka nishan nahin milta
vo rahguzar huun jise karvan nahin milta
qadam qadam pe tiri raah men falak haa.il
mujhe talash se bhi asman nahin milta
unhen tariqa-e-lutf-o-karam nahin malum
hamen saliqa-e-ah-o-fughan nahin milta
urus-e-dahr ko ghaza bhi chahiye lekin
ghubar-e-jada-e-amn-o-aman nahin milta
dhaḌak raha hai har ahl-e-vafa ke siine men
hamara dard bhara dil kahan nahin milta
sabhi ko da.ava-e-mahr-o-vafa hai duniya men
jo mehrban na ho vo mehrban nahin milta
gham-e-hayat ke pur-haul qahqahon ke siva
kahin se apna javab-e-fughan nahin milta
dil-e-shikasta ko le ja.iye kahan ‘basit’
dimagh-e-naḳhvat-e-shisha-garan nahin milta
Leave a Reply