Ada Pariyon Ki Surat Hur Ki Aankhen Ghazalon Ki

adā pariyoñ kī sūrat huur kī āñkheñ ġhazāloñ kī

ġharaz māñge kī har ik chiiz hai in husn vāloñ kī

bajā.e-raqs mai-ḳhāne meñ hai gardish pyāloñ kī

takalluf-bar-taraf ye bazm hai allāh vāloñ kī

nishāñ jab miT gayā turbat kā aa.e fātiha paḌhne

unheñ kab yaad aa.ī haiñ vafā.eñ marne vāloñ kī

huā do gaz kafan mun.im ko hāsil māl-e-duniyā se

bañdhī rakkhī hī āḳhir rah ga.ī gaThrī doshāloñ kī

dukhā kar dil mirā phir aap hī uzr-e-jafā karnā

are kāfir tirī ik chaal hai ye laakh chāloñ kī

abhī tum ko bahut kuchh naaz hai tirchhī nigāhoñ par

magar dekhī nahīñ tāsīr tum ne mere nāloñ kī

tire hote hue ye baat ġhairat kī hai o zālim

uḌaa.e āsmāñ yuuñ ḳhaak terī pā.emāloñ kī

bhale haiñ yā bure jo kuchh haiñ bande to ḳhudā ke haiñ

nadāmat is qadar vaa.iz na kar mai-ḳhāne vāloñ kī

huī bauchhār mujh par shikva-e-bejā kī phir kyā kyā

jahāñ chheḌā unheñ bas khul ga.ī gaThrī malāloñ kī

gunahgār-e-mohabbat haiñ jidhar guzreñge mahshar meñ

hamāre saath saath ik bhiiḌ hogī ḳhush-jamāloñ kī

farishtoñ se ‘hafīz’ ik din lahad meñ guftugū hogī

abhī se fikr lāzim hai tumheñ un ke savāloñ kī

Leave a Comment