ada pariyon ki surat huur ki ankhen ghazalon ki
gharaz mange ki har ik chiiz hai in husn valon ki
baja.e-raqs mai-ḳhane men hai gardish pyalon ki
takalluf-bar-taraf ye bazm hai allah valon ki
nishan jab miT gaya turbat ka aa.e fatiha paḌhne
unhen kab yaad aa.i hain vafa.en marne valon ki
hua do gaz kafan mun.im ko hasil mal-e-duniya se
bandhi rakkhi hi aḳhir rah ga.i gaThri doshalon ki
dukha kar dil mira phir aap hi uzr-e-jafa karna
are kafir tiri ik chaal hai ye laakh chalon ki
abhi tum ko bahut kuchh naaz hai tirchhi nigahon par
magar dekhi nahin tasir tum ne mere nalon ki
tire hote hue ye baat ghairat ki hai o zalim
uḌaa.e asman yuun ḳhaak teri pa.emalon ki
bhale hain ya bure jo kuchh hain bande to ḳhuda ke hain
nadamat is qadar vaa.iz na kar mai-ḳhane valon ki
hui bauchhar mujh par shikva-e-beja ki phir kya kya
jahan chheḌa unhen bas khul ga.i gaThri malalon ki
gunahgar-e-mohabbat hain jidhar guzrenge mahshar men
hamare saath saath ik bhiiḌ hogi ḳhush-jamalon ki
farishton se ‘hafiz’ ik din lahad men guftugu hogi
abhi se fikr lazim hai tumhen un ke savalon ki
Leave a Reply