makan mera azal se DhunDhti phirti thi virani
nihayat shauq se ki dil ne ranj-o-gham ki mehmani
qarar us ko nahin milta singhar us ka nahin banta
mire dil se tire gesu ne sikhi hai pareshani
ḳhata-e-fash hai ham ne jafa ko kyuun jafa samjha
qayamat tak na ja.egi hamari ye pashemani
bata.en kya tumhari ik nahin se ham pe kya guzri
umiden thiin hazaron haa.e jin par phir gaya paani
adu ke qaul ki tum ne hamesha pasdari ki
hamari baat lekin aaj tak ik bhi nahin maani
nazar aata hai asan sab jise dushvar kahte hain
tariq-e-ishq men har ek dushvari hai asani
maza deta nahin ‘hafiz’ ruḳh-o-gesu ka nazzara
misal-e-a.ina jab tak na ho ankhon men hairani
Leave a Reply