Khumar Barabankavi
vahi phir mujhe yaad aane lage hain
jinhen bhulne men zamane lage hain
vo hain paas aur yaad aane lage hain
mohabbat ke hosh ab thikane lage hain
suna hai hamen vo bhulane lage hain
to kya ham unhen yaad aane lage hain
hatae the jo raah se doston ki
vo patthar mire ghar men aane lage hain
ye kahna tha un se mohabbat hai mujh ko
ye kahne men mujh ko zamane lage hain
havaen chalin aur na maujen hi utthin
ab aise bhi tufan aane lage hain
qayamat yaqinan qarib aa gai hai
‘khumar’ ab to masjid men jaane lage hain
Leave a Reply