Raushni Mein Kis Qadar Diwar-O-Dar Achchhe Lage

raushnī meñ kis qadar dīvār-o-dar achchhe lage

shahr ke saare makāñ saare khañDar achchhe lage

pahle pahle maiñ bhī thā amn o amaañ kā mo’tarif

aur phir aisā huā nezoñ pe sar achchhe lage

jab talak āzād the har ik masāfat thī vabāl

jab paḌī zanjīr pairoñ meñ safar achchhe lage

dā.era dar dā.era paanī kā raqs jāvedāñ

aañkh kī putlī ko dariyā ke bhañvar achchhe lage

kaise kaise marhale sar terī ḳhātir se kiye

kaise kaise log tere naam par achchhe lage

Leave a Comment