Shahr-E-Mazlum Mein Ek shaKHs Bhi Barham Na Mila

shahr-e-mazlūm meñ ik shaḳhs bhī barham na milā

ḳhauf itnā thā koī paikar-e-mātam na milā

maan luuñ kaise khilegā gul-e-umīd mirā

barg-e-ulfat pe mujhe qatra-e-shabnam na milā

jo mire zaḳhm-e-aziyyat kā mudāvā kartā

chārāgar thak ga.e aisā koī marham na milā

shikva-e-gardish-e-hālāt se hāsil kyā hai

dast-e-taqdīr se jo kuchh bhī milā kam na milā

kaT ga.ī umr isī ek tajassus meñ mirī

bazm-e-ālam meñ kahīñ amn kā aalam na milā

bāġh-e-hastī mirā vīrān rahā hai daa.im

zindagī bhar mujhe barsāt kā mausam na milā

kaun kahtā hai girā ashk-e-nadāmat ‘sāhil’

zāhid-e-ḳhushk kā dāman to mujhe nam na milā

Leave a Comment