Mohammad Sharfuddin Sahil
shahr-e-mazlum men ik shaḳhs bhi barham na mila
ḳhauf itna tha koi paikar-e-matam na mila
maan luun kaise khilega gul-e-umid mira
barg-e-ulfat pe mujhe qatra-e-shabnam na mila
jo mire zaḳhm-e-aziyyat ka mudava karta
charagar thak ga.e aisa koi marham na mila
shikva-e-gardish-e-halat se hasil kya hai
dast-e-taqdir se jo kuchh bhi mila kam na mila
kaT ga.i umr isi ek tajassus men miri
bazm-e-alam men kahin amn ka aalam na mila
bagh-e-hasti mira viran raha hai daa.im
zindagi bhar mujhe barsat ka mausam na mila
kaun kahta hai gira ashk-e-nadamat ‘sahil’
zahid-e-ḳhushk ka daman to mujhe nam na mila
Leave a Reply