tum ghalat samjhe hamen aur pareshani hai
ye to asani hai jo be-sar-o-samani hai
ḳhvahish-e-did sar-e-vasl jo nikli nahin thi
lamha-e-hijr men tajrid ki uryani hai
kyuun bhala bojh uTha.un main tire ḳhvabon ka
mere a.ine men kya kam koi hairani hai
ek muddat se jo baiThi hai miri palkon par
ḳhana-e-dil men vo surat abhi anjani hai
Duub jaata hai sar-e-sham hamara dil bhi
ye bhi suraj ki tarah raat ka zindani hai
ḳhud ko ham bech ke ik ḳhvab to le paa.e nahin
tere bazar men kis chiiz ki arzani hai
kis bharose pe main Takra.un hava se ‘sajjad’
gar bikharta huun to atraf men sab paani hai
Leave a Reply