Kuchh Aarzu Ke KHwab Dikhane Lagi Hawa

Aslam Noor Aslam

kuchh aarzu ke ḳhvab dikhane lagi hava

paani ke zindagi ko satane lagi hava

ham bhi hue shikar hain iz.har-e-ishq ke

jab gesuon ke ḳham ko dikhane lagi hava

bad-e-saba tumhari mahak le ke aa ga.i

ruThe hue dilon ko manane lagi hava

laila-o-qais ham ko kahne lage hain log

rusva.iyon ko naam batane lagi hava

dil ki munDer ka ye diya kaise bujh gaya

puchha to apna pahlu bajane lagi hava

tum jo nahin ho paas to kaise badal ga.i

shabnam men bhigi raat jalane lagi hava

‘aslam’ koi jo shab kabhi zalim si ban ga.i

siine se lag ke mujh ko sulane lagi hava