Kuchh Aarzu Ke KHwab Dikhane Lagi Hawa

kuchh aarzū ke ḳhvāb dikhāne lagī havā

paanī ke zindagī ko satāne lagī havā

ham bhī hue shikār haiñ iz.hār-e-ishq ke

jab gesuoñ ke ḳham ko dikhāne lagī havā

bād-e-sabā tumhārī mahak le ke aa ga.ī

rūThe hue diloñ ko manāne lagī havā

lailā-o-qais ham ko kahne lage haiñ log

rusvā.iyoñ ko naam batāne lagī havā

dil kī muñDer kā ye diyā kaise bujh gayā

pūchhā to apnā pahlū bajāne lagī havā

tum jo nahīñ ho paas to kaise badal ga.ī

shabnam meñ bhīgī raat jalāne lagī havā

‘aslam’ koī jo shab kabhī zālim sī ban ga.ī

siine se lag ke mujh ko sulāne lagī havā

Leave a Comment