uTho rida-e-ra.unat ko taar taar karen
ḳhuda ke naam pe insaniyat se pyaar karen
chalo chaman men charaghan ba-sad vaqar karen
baḌho hayat ke daman ko lala-zar karen
na.i faza.en na.i nik.haten na.i rahen
gul-e-murad se daman ko mushk-bar karen
bhaTak na jaa.e ye insan aaj rahon men
nishan-e-manzil-e-maqsud ustuvar karen
ufuq ke paar jo mauj-e-shamim bikhri hai
usi se ghuncha-e-ḳhatir ko mushk-bar karen
falak pe aaj sitaron ko DhunDne vaale
miri nazar ke sitaron ka kuchh shumar karen
‘aziz’ aaj gham-e-dil ki dastan kah kar
vo chahte hain zamane ko sogvar karen
Leave a Reply