ai ishq kahin le chal is paap ki basti se
nafrat-gah-e-alam se laanat-gah-e-hasti se
in nafs-paraston se is nafs-parasti se
duur aur kahin le chal!
ai ishq kahin le chal!
ham prem pujari hain to prem kanhiyya hai
to prem kanhiyya hai ye prem ki nayya hai
ye prem ki nayya hai tu is ka khevayya hai
kuchh fikr nahin le chal!
ai ishq kahin le chal!
be-rahm zamane ko ab chhod rahe hain ham
bedard azizon se munh mod rahe hain ham
jo aas ki thi vo bhi ab tod rahe hain ham
bas taab nahin le chal!
ai ishq kahin le chal!
ye jabr-kada azad afkar ka dushman hai
armanon ka qatil hai ummidon ka rahzan hai
jazbat ka maqtal hai jazbat ka madfan hai
chal yaan se kahin le chal!
ai ishq kahin le chal!
aapas men chhal aur dhoke sansar ki riten hain
is paap ki nagri men ujdi hui parten hain
yaan nyaye ki haren hain annyaye ki jiten hain
sukh chain nahin le chal!
ai ishq kahin le chal!
ik mazbah-e-jazbat-o-afkar hai ye duniya
ik maskan-e-ashrar-o-azar hai ye duniya
ik maqtal-e-ahrar-o-abrar hai ye duniya
duur is se kahin le chal!
ai ishq kahin le chal!
ye dard bhari duniya basti hai gunahon ki
dil-chak umidon ki saffak nigahon ki
zulmon ki jafaon ki aahon ki karahon ki
hain gham se hazin le chal!
ai ishq kahin le chal!
aankhon men samai hai ik khvab-numa duniya
taron ki tarah raushan mahtab-numa diya
jannat ki tarah rangin shadab-numa duniya
lillah vahin le chal!
ai ishq kahin le chal!
vo tiir ho sagar ki rut chhai ho phagun ki
phulon se mahakti ho purvai ghane ban ki
ya aath pahar jis men jhad badli ho savan ki
ji bas men nahin le chal!
ai ishq kahin le chal!
qudarat ho himayat par hamdard ho qismat bhi
‘salma’ bhi ho pahlu men ‘salma’ ki mohabbat bhi
har shai se faraghat ho aur teri inayat bhi
ai tifl-e-hasin le chal!
ai ishq kahin le chal!
ai ishq hamen le chal ik nuur ki vaadi men
ik khvab ki duniya men ik tuur ki vaadi men
huron ke khayalat-e-masrur ki vaadi men
ta khuld-e-barin le chal!
ai ishq kahin le chal!
sansar ke us paar ik is tarah ki basti ho
jo sadiyon se insan ki surat ko tarasti ho
aur jis ke nazaron par tanhai barasti ho
yuun ho to vahin le chal!
ai ishq kahin le chal!
maghrib ki havaon se avaz si aati hai
aur ham ko samundar ke us paar bulati hai
shayad koi tanhai ka des batati hai
chal is ke qarin le chal!
ai ishq kahin le chal!
ik aisi faza jis tak gham ki na rasai ho
duniya ki hava jis men sadiyon se na aai ho
ai ishq jahan tu ho aur teri khudai ho
ai ishq vahin le chal!
ai ishq kahin le chal!
ek aisi jagah jis men insan na baste hon
ye makr o jafa-pesha haivan na baste hon
insan ki qaba men ye shaitan na baste hon
to khauf nahin le chal!
ai ishq kahin le chal!
barsat ki matvali ghanghor ghataon men
kohsar ke daman ki mastana havaon men
ya chandni raton ki shaffaf fazaon men
ai zohra-jabin le chal!
ai ishq kahin le chal!
in chand sitaron ke bikhre hue shahron men
in nuur ki kirnon ki thahri hui nahron men
thahri hui nahron men soi hui lahron men
ai khizr-e-hasin le chal!
ai ishq kahin le chal!
ik aisi bahisht aaiin vaadi men pahunch jaaen
jis men kabhi duniya ke gham dil ko na tadpaen
aur jis ki baharon men jiine ke maze aaen
le chal tu vahin le chal!
ai ishq kahin le chal!
Leave a Reply