Hai Muamma Ya Kahani Ishq Hai

hai muamma yā kahānī ishq hai

aa.ine se ḳhud-kalāmī ishq hai

hañste hañste ro paḌe phir hans diye

kyā yahī aadat purānī ishq hai

ik tamannā ne jagāyā thā junūñ

us junūñ kī pāsbānī ishq hai

zikr us kā nā-mukammal hai magar

ḳhāmoshī kī tarjumānī ishq hai

maut ke sab zāviye paḌhtī huī

ham sabhī kī zindagānī ishq hai

us kī jab shīrīñ-bayānī ko sunā

maan baiThe jāvedānī ishq hai

Leave a Comment