Ammar Yasir Migsi
ayat-e-husn ki jab main ne tilavat ki thi
ishq ne aa ke mire haath pe bai.at ki thi
jab subut aur zamana tha mohabbat ke ḳhilaf
main ne us vaqt zuleḳha ki himayat ki thi
mujh ko marne na diya sher utare mujh par
ishq ne bas ye mire saath ri.ayat ki thi
garm bazar hai dil ka to ḳhasara hi sahi
tai ḳharidar se main ne yahi qimat ki thi
tum jo phir puchhne aa.e ho unhi baton ki
main ne chup rah ke ka.i baar vazahat ki thi
Leave a Reply