aisa hone nahin deta tha magar hone ko hai
zindagi ab to na jiine men basar hone ko hai
par jo kaate gae ja phaile havaon men tamam
apni parvaz ba-andaz-e-digar hone ko hai
vahshat-e-dil tujhe le kar main kahan jaun bata
rahte rahte to ye virana bhi ghar hone ko hai
dil se phir khel rahi hain vahi ziddi yaden
zarra zarra mira phir zer-o-zabar hone ko hai
shama ki lau ki tarah jaan dhali jaati hai aaj
shayad apni shab-e-gham ki bhi sahar hone ko hai
surakh-ru khun-e-jigar se hi hua karte hain log
kya hai ‘bilqis’ agar jaan ka zarar hone ko hai
Leave a Reply