Ghulam Mohammad Qasir
raat us ke samne mere siva bhi main hi tha
sab se pahle main gaya tha dusra bhi main hi tha
main muḳhalif samt men chalta raha huun umr bhar
aur jo us tak gaya vo rasta bhi main hi tha
sab se kaT kar rah gaya ḳhud main simaT kar rah gaya
silsila TuuTa kahan se sochta bhi main hi tha
sab se achchha kah ke us ne mujh ko ruḳhsat kar diya
jab yahan aaya to phir sab se bura bhi main hi tha
vaqt ke mehrab men jo be-sabab jalta raha
raat ne mujh ko bataya vo diya bhi main hi tha
ḳhud se milne ki tamanna par zaval aane ke baad
vo samajhta hai ki us ka aa.ina bhi main hi tha
Leave a Reply