Kabhi Zuhur Mein Aa Ja Kamal Hone De

kabhī zuhūr meñ aa jā kamāl hone de

junūñ ko bāñdh na mere dhamāl hone de

jo ḳhud-kushī bhī karūñgā nahīñ marūñgā maiñ

kuchh is tarah se tū apnā visāl hone de

kahīñ to rakh le mujhe bhī mirī mohabbat bhī

ki apne dil meñ basā le nihāl hone de

maiñ ḳhud se laḌne kī rut meñ tumhārā sāthī huuñ

mujhe vajūd meñ ugne de Dhaal hone de

ḳhudā-e-vasl Thahar jā abhī taḌapne de

machal machal ke zuleḳhā sā haal hone de

sila zarūr hai ‘sā.im-jī’ hijr rātoñ kā

kisī kī yaad meñ āñkheñ to laal hone de

Leave a Comment