Saim Ji
kabhi zuhur men aa ja kamal hone de
junun ko bandh na mere dhamal hone de
jo ḳhud-kushi bhi karunga nahin marunga main
kuchh is tarah se tu apna visal hone de
kahin to rakh le mujhe bhi miri mohabbat bhi
ki apne dil men basa le nihal hone de
main ḳhud se laḌne ki rut men tumhara sathi huun
mujhe vajud men ugne de Dhaal hone de
ḳhuda-e-vasl Thahar ja abhi taḌapne de
machal machal ke zuleḳha sa haal hone de
sila zarur hai ‘sa.im-ji’ hijr raton ka
kisi ki yaad men ankhen to laal hone de
Leave a Reply