Chand Ka Khwab Ujalon Ki Nazar Lagta Hai

chand ka ḳhvab ujalon ki nazar lagta hai

tu jidhar ho ke guzar jaae ḳhabar lagta hai

us ki yadon ne uga rakkhe hain suraj itne

shaam ka vaqt bhi aae to sahar lagta hai

ek manzar pe thaharne nahin deti fitrat

umr bhar aankh ki qismat men safar lagta hai

main nazar bhar ke tire jism ko jab dekhta huun

pahli barish men nahaya sa shajar lagta hai

be-sahara tha bahut pyaar koi puchhta kya

tu ne kandhe pe jagah di hai to sar lagta hai

teri qurbat ke ye lamhe use raas aaen kya

sub.h hone ka jise shaam se Dar lagta hai

Leave a Comment