main kya karun ki nahin dil pe iḳhtiyar mujhe
vagarna teri mohabbat hai nagavar mujhe
na din ko chain na raton ko hai qarar mujhe
bas ab to rahne de tanha ḳhayal-e-yar mujhe
lipaT ke so ga.iin sahil se jab thaki maujen
vo yaad aa.e sar-e-sham baar baar mujhe
main thak chala huun gham-e-zindagi ki rahon men
kahan hai ai gham-e-janan zara pukar mujhe
nikal gaya huun bahut duur manzil-e-dil se
pukarti hai magar teri rahguzar mujhe
bhare hain zaḳhm-e-mohabbat baḌi musibat se
ilahi dekh ke un ko na aa.e pyaar mujhe
na koi aisi tavaqqo na rasm-o-rah-e-payam
na jaane kyuun hai tire ḳhat ka intizar mujhe
Leave a Reply