agha-shayar-qazalbash

Ye Kaise Baal Khole Aae Kyun Surat Bani Gham Ki

ye kaise baal khole aae kyuun surat bani gham ki

tumhare dushmanon ko kya padi thi mere matam ki

shikayat kis se kiije haae kya ulta zamana hai

badhaya pyaar jab ham ne mohabbat yaar ne kam ki

jigar men dard hai dil muztarib hai jaan be kal hai

mujhe is be-khudi men bhi khabar hai apne aalam ki

nahin milte na miliye khair koi mar na jaega

khuda ka shukr hai pahle mohabbat aap ne kam ki

adu jis tarah tum ko dekhta hai ham samajhte hain

chhupao laakh tum chhupti nahin hai aankh mahram ki

maza is men hi milta hai namak chidko namak chidko

qasam le lo nahin aadat mire zakhmon ko marham ki

kahan jaana hai tham-tham kar chalo aisi bhi kiya jaldi

tum hi tum ho khuda rakkhe nazar padti hai aalam ki

koi aisa ho aina ki jis men tu nazar aae

zamane bhar ka jhuta kya haqiqat saghar-e-jam ki

ghataen dekh kar be-tab hai bechain hai ‘shair’

tire qurban o mutrib suna de koi mausam ki

More Poems

Leave a Comment