Faza Ibn E Faizi
ab shahr men kahan rahe vo ba-vaqar log
mil kar ḳhud apne-ap se hain sharmsar log
hathon men vaqt ke to koi sang bhi na tha
kyuun TuuT kar bikhar ga.e a.ina-var log
apne dukhon pe tanz koi khel to na tha
zaḳhmon ko phuul kah ga.e ham vaz.a-dar log
baiThe hain rang rang ujale tarashne
rakh kar lahu ki sham.a sar-e-rahguzar log
kuchh sadgi-e-tab.a thi kuchh maslahat ka jabr
kanTon ko pujte rahe bagh-o-bahar log
ab-o-hava-e-shahr junun-ḳhez thi bahut
daman nahin the phir bhi hue taar taar log
phunka hamen to narm shagufon ki os ne
jiite hain kaise dil men chhupa kar sharar log
Leave a Reply