tujhe main ne pa ke jo kho diya ye mire nasib ki chaal hai
mire chara-gar tujhe kya ḳhabar ki bichhaḌna kitna muhal hai
kisi ghair se miri ḳhairiyat tira puchhna bhi to kam nahin
mujhe ye yaqin to ho gaya tujhe ab bhi mera ḳhayal hai
uThe zalzale chalin andhiyan ye charagh phir bhi nahin bujha
ye karam nahin kisi aur ka tiri rahmaton ka kamal hai
hai ajiib moḌ pe zindagi na to gham raha na ḳhushi rahi
na ghurur hai na surur hai na uruuj hai na zaval hai
tiri bevafa.i bhula to duun magar is ḳhayal ka kya karun
mire bas men kuchh bhi nahin raha mire dil ke shishe men baal hai
kahin titliyon ka pata nahin ki parinda koi bacha nahin
vahi phuul hain vahi ḳhaar hain vahi peḌ hai vahi Daal hai
vo bichhaḌ ke jiine ka faisla to mujhe bujha ke chala gaya
na yaqin hai na guman hai na mire labon pe saval hai
yahan har taraf hain numa.ishen na dilon ka chain na rahaten
na vo sadgi na vo dil-kashi na vo husn hai na jamal hai
na vo ḳhvab ankhon men unghte na vo raat jagne ke silsile
na vo jangalon ki kahaniyan na vo vahshaton ka ghazal hai
Leave a Reply