Wo Jis Ka Sath Nibhane Ka Hausla Na Hua

vo jis ka saath nibhane ka hausla na hua

bichhad gaya to bhulane ka hausla na hua

idhar udhar ke sunae hazar afsane

dilon ki baat sunane ka hausla na hua

ye aur baat ki ba-hausla huun main phir bhi

nae charag jalane ka hausla na hua

ḳhalij kitne zamanon ki kar gaya paida

vo ik qadam ki uthane ka hausla na hua

kitab-e-zehn ka koi varaq bhi saada nahin

likhe huruf mitane ka hausla na hua

guzar gai thi shab-e-hijr hijr men ‘uzma’

charag phir bhi bujhane ka hausla na hua

Leave a Comment