Adu-E-Din-O-Iman Dushman-E-Amn-O-Aman Nikle

Jitendra Mohan Sinha Rahbar

adu-e-din-o-iman dushman-e-amn-o-aman nikle

tire paikan baḌe jabir baḌe na-mehrban nikle

adaon ne lubhaya di nigah-e-naz ne davat

magar alfaz dil-shikani men meri kamran nikle

mukar lo ishq se lekin sar-e-mahshar na kahna kuchh

vahan par kaun jaane koi apna raz-dan nikle

tumhari bazm hai rutbe men jannat se bhi bala-tar

yahan piiri men aa.e ham magar ho kar javan nikle

baḌa charcha hai koh-e-tur ka vadi-e-aiman ka

bahut aghlab hai vo dar-parda meri dastan nikle

bayaban men chaman men dasht men ya koh-e-viran men

ḳhuda jaane kahan pahunche jo su-e-ashiyan nikle

hamari maut bhi ik mauj hai dariya-e-hasti ki

bas ik ghota lagana hai yahan Duube vahan nikle

mo.attar kar ga.i bu-e-vafa mahaul-e-alam ko

mire har qatra-e-ḳhun se hazaron gulistan nikle

chhupe hain saat pardon men ye sab kahne ki baten hain

unhen meri nigahon ne jahan DhunDa vahan nikle

ye vaqt-e-naz.a kaisa kaisi takmil-e-hayat ai dil

ummiden kab huiin puuri abhi arman kahan nikle

ḳhuda ka shukr be-dam-o-diram the mai-kade men ham

magar pir-e-mughan apne purane mehrban nikle

haqiqat ko jo dekha ik na.i duniya nazar aa.i

sitam goya karam tha dushman-e-jan pasban nikle

mohabbat men luTe lekin bahut achchhe rahe ‘rahbar’

guman tha jin pe rahzan ka vo mir-e-karvan nikle