Jafar Shirazi
kahin faza men koi abr tairna to chahiye
kahan hava.en kho ga.i hain sochna to chahiye
ye aur baat baagh baagh kar ga.iin tabi.aten
zara qarib se hansi ko dekhna to chahiye
ye maslahat bhi kya ki dil ki vus.aten hon munjamid
ragon men zindagi ka ḳhuun dauḌna to chahiye
main in udasiyon ko in rafaqaton ko kya karun
kiran ko jagna hava ko bolna to chahiye
unhen bhi nok-e-sang se zara hila ke dekh luun
ki paniyon ka ye sukut toḌna to chahiye
ye kya hua baḌha ke silsile mujhe bhula diya
kahin mile to ‘ja.afar’ us se puchhna to chahiye
Leave a Reply