nishat-e-manzil-e-qalb-o-nazar ko yaad karo
safar men apne kisi ham-safar ko yaad karo
baḌe ḳhulus se tarik raston pe chalo
baḌe tapak se husn-e-sahar ko yaad karo
jale charagh to chupke se naam lo mera
mile ḳhushi to miri chashm-e-tar ko yaad karo
jo dil men rah ke bhi anjan si rahi barson
kisi ki us nigah-e-fitna-gar ko yaad karo
dil-e-hazin ka taqaza hai jada-e-gham men
nazar ke saath fareb-e-nazar ko yaad karo
qadam qadam pe jahan zindagi nikharti thi
kisi ke pyaar ki us rahguzar ko yaad karo
hai jis ke faiz se ab tak bhi raushni ghar men
‘ra.is’ ab bhi usi chashm-e-tar ko yaad karo
Leave a Reply