Aziz Qaisi
aah be-asar nikli naala na-rasa nikla
ik ḳhuda pe takiya tha vo bhi aap ka nikla
kaash vo mariz-e-gham ye bhi dekhta aalam
charagar ye kya guzri dard jab dava nikla
ahl-e-ḳhair Duube the nekiyon ki masti men
jo ḳharab-e-sahba tha bas vo parsa nikla
ḳhizr jaan kar ham ne jis se raah puchhi thi
aa ke biich jangal men kya bata.en kya nikla
gir gaya andhere men tere mehr ka suraj
dard ke samundar se chand yaad ka nikla
ishq kya havas kya hai bandish-e-nafas kya hai
sab samajh men aaya hai tu jo bevafa nikla
jis ne di sada tum ko sham.a ban ke zulmat men
rah-gazidgan dekho kis ka naqsh-e-pa nikla
ik nava-e-rafta ki bazgasht thi ‘qaisi’
dil jise samajhte the dasht-e-be-sada nikla
Leave a Reply