Poet
adhura jism liye pichhe haT raha huun main
ki ik kinara huun dariya ka kaT raha huun main
mire vajud ko vus.at nahin kisi bhi tarah
har ek samt se har roz ghaT raha huun main
asar-pazir huun ik zalzale se hasti ke
zamin ke jaise har ik saans phaT raha huun main
hain mere vaste ḳhanjar shua.en suraj ki
khuli saḌak pe huun har lamha kaT raha huun main
hai mere samne tera kitab sa chehra
aur is kitab ke auraq ulaT raha huun main
pighal raha huun khaḌi dhuup hai mire sar par
ki ik daraḳht ka saaya huun ghaT raha huun main
mira vajud shikasta si ek naav sahi
bhanvar ki lahron se tanha nimaT raha huun main
main ik ghazal huun mujhe kahiye kavish-e-ghalib
ki shahr shahr dimaghon men baT raha huun main
Leave a Reply