main lipaTta raha huun ḳharon se
tum ne puchha nahin baharon se
chandni se sahab-paron se
ji bahalta hai yadgaron se
aa mire chand raat suuni hai
baat banti nahin sitaron se
manzil-e-zindagi hai kitni duur
puchh leta huun rahguzaron se
baat jab bhi chhiḌi mohabbat ki
ḳhamushi bol uThi mazaron se
ek bhi aftab ban na saka
laakh TuuTe hue sitaron se
sham-e-gham bhi guzar ga.i hai ‘zafar’
khelte khelte ghubaron se
Leave a Reply