bal-o-par rakhte nahin azm-e-safar rakhte hain
shauq-e-parvaz ba-andaz-e-digar rakhte hain
haath uThane ki koi shart dua men kab hai
tere ushshaq nigahon men asar rakhte hain
bil-irada na sahi yuun hi kabhi aa jaao
pyaar ke raste men ham chhoTa sa ghar rakhte hain
ye alag baat ki aate hain nazar zarra-sifat
varna qadmon men to ham shams-o-qamar rakhte hain
dhuup hai ret hai aur apna safar hai jaari
saaya rakhte hain na ham log shajar rakhte hain
us taraf vaale nazar aate hain larzida magar
is taraf vaale kaf-e-dast pe sar rakhte hain
pur-sukun hai jo faza us pe na jaana ‘anjum’
ashiyan kitne abhi barq-o-sharar rakhte hain
Leave a Reply