Mushaf Iqbal Tausifi
jo ḳhas-e-badan tha jala bahut ka.i nik.haton ki talash men
main tamam logon se mil chuka tiri qurbaton ki talash men
tiri aankh se miri aankh tak faqat ek manzar-e-ḳhak hai
vahi sham-e-tira-sarisht si mili muddaton ki talash men
koi ḳhvab sar se pare raha ye safar sarab-e-safar raha
main shanaḳht apni ganva chuka ga.i suraton ki talash men
ye jo jhankti hai nafas nafas koi mauj-e-ḳhun si uThi hui
bane zindagi ki na qatl-gah kahin vahshaton ki talash men
mire zaḳhm ab tu siyega kya mire an.suon ko piyega kya
tire za.iqe hi badal ga.e na.i lazzaton ki talash men
Leave a Reply