Poet
nigahen uTh rahi hain meri janib ik zamane ki
bharam khul ja.ega koshish na kiije muskurane ki
zamane ke sitam un ki jafa miri fida-kari
yahi shayad banengi surḳhiyan mere fasane ki
jahan se bijliyon ka qafila guzra hai gulshan men
vahin buniyad rakh chhoḌi hai main ne ashiyane ki
ḳhizan ke ruḳh pe zahrila tabassum main ne dekha hai
kali ko mil ga.i shayad ijazat muskurane ki
mashiyyat ka ye mansha hai main tufanon men ubharunga
zamana laakh kar le sazishen mere miTane ki
nasihat karne vaalo shukriya lekin ye batlao
kahan se la.un himmat un ke dar se lauT aane ki
kabhi majburi-e-halat men aisa bhi hota hai
safinon ko hua karti hai ḳhvahish Duub jaane ki
andheron ne ‘qamar’ kya kya miri rahon ko roka hai
kabhi koshish jo main ne ki koi sham.a jalane ke
Leave a Reply