Prem Warbartani
kabhi khole to kabhi zulf ko bikhra.e hai
zindagi shaam hai aur shaam Dhali jaa.e hai
har ḳhushi mom ki guḌiya hai muqaddas guḌiya
taaj sho.alon ka zamana jise pahna.e hai
ḳhamushi kya kisi gumbad ki faza hai jis men
guunj ke meri hi avaz palaT aa.e hai
zindagi puchhe hai ro kar kisi beva ki tarah
chuḌiyan kaun mire haath men pahna.e hai
dil kisi jam-e-labalab ki tarah lahra kar
phir tire dast-e-hina.i men chhalak jaa.e hai
kaun samjhe mire iḳhlas ki azmat ko bhala
main vo dariya huun jo qatre men sama jaa.e hai
‘prem’ dekho to sahi zaḳhmon ke zevar ki phaban
sha.eri ban ke dulhan aur bhi sharma.e hai
Leave a Reply