fasl-e-gul men naiin baghule uthte viranon ke beach
khaak divanon ki vajdi hai bayabanon ke beach
vo jala majnun ke dil ka koela aati thi phunk
varna laila kaahe ko jaati bayabanon ke beach
jaise girhen de koi zunnar ka subha banae
pur hai kufr-e-ishq tyuun iman ke danon ke beach
pur hain mushk-e-tir-bakhti se miri sab dil ke ghaav
jis tarah latke hai zulf-e-dil-baran shanon ke beach
ruuh meri bhi nahin chhodegi rang-e-sair-e-bagh
juun bhari rahti hai bu-e-gul gulistanon ke beach
fasl-e-gul aai ki zanjiron ke sar par naale kar
naach uthe divane dastak de ke zindanon ke beach
laal ho ishrat se juun gul hans uthe hain mere gosh
yaar ke aane ki juun pahunchi khabar kanon ke beach
har sukhan ko fakhr hai ‘uzlat’ tavajjoh se miri
huun imam-e-vaqt dilli ke sukhan-danon ke beach
Leave a Reply