abdul-ahad-saaz

Be-Nishan Hone Se Pahle

zindagi ik duur tak sangit thi ab shor hai

haan magar is shor ke bikhrav men

be-mahaba saut ke takrav men

shayad abhi andokhta kuchh zer-o-bam hon

aao ham tum

koi zer-o-bam talashen

koi pech-o-kham tarashen

aur is tartib-kari ki shuuri koshishon ko

la-shuuri naghmagi ki akhiri mitti hui si guunj se angez kar ke

ek shab

koi ik ahang de den

is se pahle ki ye shor-e-na-tamam

sur-e-israfil ke itmam men kho jaae

hashr utthe aur qayamat aae

aur ham ko jhonk de avaz ke ik munqat’a rishte ke dozakh men

faisla kar de hamare darmiyan

ik daimi khud-na-shanasi ke jahannam ka

is se pahle

aao ham tum

is khalij-e-na-rasai par

sada ke pul bana den

be-nishan hone se pahle

is zamin par akhiri pahchan ki duniya basa len

More Poems

Leave a Comment