dil dhadakne ka sabab yaad aaya
vo tiri yaad thi ab yaad aaya
aaj mushkil tha sambhalna ai dost
tu musibat men ajab yaad aaya
din guzara tha badi mushkil se
phir tira vaada-e-shab yaad aaya
tera bhula hua paiman-e-vafa
mar rahenge agar ab yaad aaya
phir kai log nazar se guzre
phir koi shahr-e-tarab yaad aaya
hal-e-dil ham bhi sunate lekin
jab vo rukhsat hua tab yaad aaya
baith kar saya-e-gul men ‘nasir’
ham bahut roe vo jab yaad aaya
Leave a Reply