nala-e-jan-gudaz ne maara
soz-e-ulfat ke saaz ne maara
ye kaha paḌh ke mera nama-e-shauq
us sarapa niyaz ne maara
munh se uff bhi to kar nahin sakte
ḳhauf-e-ifsha-e-raz ne maara
zindagi chain se guzarti thi
chashm-e-nazzara-baz ne maara
daad bhi shauq-e-did ki na mili
jalva-e-be-niyaz ne maara
maut ki zad se bach gaya jo koi
us ko umr-e-daraz ne maara
ungliyan har taraf se uThti hain
turra-e-imtiyaz ne maara
koi dam-saz koi hai jan-baz
aap ke saz-baz ne maara
jis ke qabze men hai masiha.i
ham ko is tegh-e-naz ne maara
kya bharosa kisi pe ho ai ‘josh’
dil ko ik dil-navaz ne maara
Leave a Reply