Shahida Lateef
ajab ajiib gham-e-ehtimal rakhte hue
kisi ka ḳhvab kisi ka ḳhayal rakhte hue
ana bhi koh-e-giran ki tarah hai phir darpesh
tire huzur talab ka saval rakhte hue
koi ḳhazina-e-rahat na apne kaam aaya
daraz-e-dil men zara sa malal rakhte hue
main aftab huun lekin ik e’timad ke saath
chamak rahi huun main ranj-e-zaval rakhte hue
tamam umr to rakhni nahin ye ranjish-e-dil
ye soch leta vo shishe men baal rakhte hue
Leave a Reply